បានខ្លួនប្រាណគេហើយចង់ដោះដៃ មានអីគេតាមដល់ផ្ទះ យកដុំថ្មគប់បែកក្បាលប្រពន្ធដើម
ភ្នំពេញ៖ មេជាងសំណង់ម្នាក់ទាក់ទងមេម៉ាយកូន២បានខ្លួនប្រាណហើយចង់បោះបង់ធ្វើឲ្យនាងខឹង តាមទៅរកដល់ផ្ទះប្រពន្ធដើមទាស់ពាក្យសម្តីគ្នាទាញដុំថ្មគប់ប្រពន្ធដើមបែកក្បាល បង្កឲ្យមានការភ្ញាក់ផ្អើលកាលពីវេលាម៉ោងម៉ោង៩យប់ថ្ងៃទី១៣ ខែមករា ឆ្នាំ២០១៨ ស្ថិតនៅក្នុងភូមិដំណាក់ សង្កាត់គោកឃ្លាង ខណ្ឌសែនសុខ ។
បុរសមានប្រពន្ធ២មានឈ្មោះ ចន សុភ័ក្រ អាយុ៣០ឆ្នាំ មុខរបរមេការសំណង់ ស្នាក់នៅផ្ទះកន្លែងកើតហេតុ ។ ប្រពន្ធដើមមានឈ្មោះ ខ.ណ.រ អាយុ៣២ឆ្នាំ មុខរបរមេផ្ទះ ស្នាក់នៅកន្លែងកើតហេតុ មានកូនស្រី២នាក់រស់នៅក្នុងបន្ទុក ។ ចំណែកឯស្ត្រីជាប្រពន្ធចុងមានឈ្មោះ ម.ស.ន អាយុ៤២ឆ្នាំ ជាស្ត្រីមេម៉ាយ មានមុខរបរនៅផ្ទះ មានកូនប្រុស២នាក់ មានទីលំនៅភូមិសំរោង សង្កាត់សំរោងក្រោម ខណ្ឌពោធិ៍សែនជ័យ ។
បើតាមស្ត្រីជាប្រពន្ធដើមបានឲ្យដឹងថា គាត់ក៏មិនច្បាស់ការថាប្តីរបស់គាត់បង្កាត់ភ្លើងស្នេហ៍ជាមួយអ្នកមេម៉ាយខាងលើពីពេលណានោះដែរ ហើយស្នេហាស៊ីជម្រៅដល់កម្រឹតណានោះក៏មិនបានដឹងច្បាស់ដែរ ក៏ប៉ុន្តែតាមអ្វីដែលគាត់ដឹងប្តីរបស់គាត់ធ្លាប់ទៅធ្វើរបងផ្ទះឲ្យអ្នកមេម៉ាយខាងលើហើយមិនដឹងថា យ៉ាងម៉េចបានជាប្តីរបស់គាត់ទៅលង់នឹងសម្រស់ស្ត្រីខាងលើវ័យរហូតដល់៤០ប្លាយទៅហើយសង្ស័យនៅផ្ទះហូបតែសម្លម្ជូរពេកក៏មិនដឹង ទើបតែកន្លះខែកន្លងមកនេះប្តីរបស់គាត់ប្លែកទាំងសម្តីសម្តៅ និយាយទូរស័ព្ទដូចជាលាក់លៀមហាក់បីដូចជាមានរឿងអាថកំបាំង តែទោះជាយ៉ាងណាក៏ដោយអ្វីដែលលោកប្តីលួចសាងនោះលាក់មិនជិតឡើយក្រោយពីបែកធ្លាយរឿងតាមរយៈទូរស័ព្ទ ស្ត្រីប្រពន្ធចុងទូរស័ព្ទមកប្តីរបស់គាត់តែប្តីគាត់ជាប់រវល់គាត់លើកទទួលជំនួសស្ត្រីមេម៉ាយអះអាងថា ខ្លួនជាប្រពន្ធទៅវិញ ទើបកើតទៅជារឿងងឿងឆ្ងល់ លោកប្តីដែលខ្លួនដេកឱបនឹងដើមទ្រូងរាល់យប់សោះ ចុះហេតុអ្វីបានជាអ្នកផ្សេងមកអះអាងថាត្រូវជាប្រពន្ធ?
ទើបតែនៅរសៀលថ្ងៃទី១៣ ខែមករា ឃើញស្ត្រីខាងលើមកផឹកស៊ីនៅហាងមុខផ្ទះតែមិនបានចាប់អារម្មណ៍លុះដល់វេលាម៉ោង៩យប់ថ្ងៃដដែលនេះស្ត្រីរូបនេះស្ថិតក្នុងសភាពស្រវឹងបែរជាមករករឿងគាត់ដល់ក្នុងផ្ទះទៅវិញ ទាមទារសុំយកប្តី អ្វីៗពេលនេះស្រឡាំងកាំងចង់ភាំងបន្តិច ចង់សន្លប់បន្តិច ក្រោយពីមានស្រីផ្សេងមកសុំយកប្តី ក្រោយពីទាស់សម្តីគ្នាទៅវិញទៅមក ស្ត្រីជាប្រពន្ធចុងស្រវាទាញបានដុំថ្មគប់សម្តៅប្រពន្ធដើមបណ្តាលឲ្យរងរបួសបែកក្បាល បង្កឲ្យផ្អើលអស់អ្នកភូមិ ទាំងសមត្ថកិច្ចចុះទៅអន្តរាគមន៍ឃាត់ទាំងជនរងគ្រោះទាំងជនបង្កទៅសម្របសម្រួលនិយាយគ្នានៅប៉ុស្តិ៍នគរបាល ខណៈដែលរឿងរ៉ាវសង្គ្រាមស្នេហាខាងលើផ្ទុះឡើងភាគីខាងប្រុស បានគេចខ្លួនបាត់ ។
នៅចំពោះមុខសមត្ថកិច្ចស្ត្រីបង្កបានឲ្យដឹងថា រឿងស្នេហាខាងលើនេះទាល់តែទម្ពក់វាទៅទើបព្នៅវាមកគាត់ស្រឡាញ់គ្នាជាមួយបងមេជាងសំណង់អស់រយៈពេលជាង១ខែមកហើយ គ្រាដើមផ្តើមស្នេហ៍ខណៈដែលលោកបងជាងសំណង់គាត់ទៅធ្វើរបងផ្ទះគាត់នៅភូមិសំរោង សង្កាត់សំរោងក្រោម ក្នុងការងាររបស់ជាងបណ្តើរ និយាយលេងបណ្តើរសាកសួរទៅលោកបងជាងប្រាប់ថា ខ្លួននៅទំនេរ «ពោះម៉ាយ» គិតថា កាលបើលោកពោះម៉ាយប៉ះជាមួយអ្នកមេម៉ាយក៏គ្មានអ្វីខុសទាស់ដែរ ។
ការផ្តល់កម្លាំងចិត្តឲ្យជាងកំពុងធ្វើរបងផ្ទះកាន់តែស៊ីជម្រៅរហូតឈានដល់បង្កាត់ភ្លើងស្នេហ៍ជាមួយមេជាងទើបហ៊ានប្រគល់ខ្លួនបង់ប្រាណឲ្យលោកមេជាងសំណង់ ម្តងហើយម្តងទៀត ទើបក្នុងរយៈពេល៣ថ្ងៃមកនេះគាត់មកម្តុំភូមិដំណាក់ផ្ទួនៗគ្នាតាមរកលោកបងជាងសំណង់ តែមិនឃើញមិនដឹងថាចង់ដោះដៃ ឬយ៉ាងណានោះទេ បានខ្លួនបានប្រាណហើយចង់គេចក៏មិនដឹង លុះមកដល់រសៀលថ្ងៃទី១៣ មករា គាត់មកផ្ទះពេទ្យធ្មេញនៅក្នុងភូមិដំណាក់រហូតចូលហាងផឹកស៊ីតាំងពីថ្ងៃរសៀលរហូតដល់យប់ម្យ៉ាងរងចាំមើលផ្លូវប្រុសបងនួនល្អងចេញមករកអូនពេលណា យូរពេកដើរទៅសួរដល់ក្នុងផ្ទះប្រទះពាក្យសម្តីកើតជម្លោះជ្រុលដៃគប់ប្រពន្ធដើមនឹងដុំថ្ម ។
ភាគីទាំង២ក្រោយកើតជម្លោះបង្កឲ្យមានរបួសស្នាមទៅលើភាគីប្រពន្ធដើម ប៉ូលិសហៅចូលប៉ុស្តិ៍សម្របសម្រួលគ្នារឿងហិង្សាទីបំផុតភាគីបង្កសងចេញថ្លៃព្យាបាលរបួសចំនួន១០ម៉ឺនរៀលដើម្បីបញ្ចប់រឿងហិង្សា ។ ដោយឡែកចំណោះរឿងស្នេហាយ៉ាងណានោះទុកឲ្យភាគីទាំង៣ក្នុងរឿងជាអ្នកដោះស្រាយពេលក្រោយក្នុងហេតុផលមួយ អ្នកណាចងអ្នកនោះជាអ្នកស្រាយ ៕
Post a Comment